TRIP TO LUNETA

Parang magic ang nangyari sa akin kagabi!

Medyo sabog pa ang mga chapters para sa librong sinusulat ko about komiks. Hindi pa kasi ako makapag-concentrate sa dami ng 'raket'. Then kahapon ng umaga, binalikan kong basahin ulit ang mga naisulat ko na. Doon ko lang na-realize na mali lahat ng naisulat ko. Mali dahil parang hindi ganoon ang gusto kong gawing presentation sa libro. Masyadong pormal at academic. Gusto ko ay makaka-relate kahit hindi gumagawa ng komiks. Gusto ko lahat ng tao ay makabasa. Tagos sa puso, may humor, at down-to-earth na paglalahad.

Then bigla ko na lang naisip 'yung libro ni Ricky Lee na 'Trip to Quiapo' tungkol sa scriptwriting. Tiningnan ko ulit ang laman nu'n. Iniisa-isa ko ang bawat chapter. Naisip ko, dapat ganito kagaan pero very informative, dapat malapit sa reader ang pagtuturo.

Buong maghapon kong ni-revise ang lahat ng naisulat ko na.

Kinagabihan, naisipan kong mamasyal ulit sa Luneta. Member kasi ako doon ng 'Luneta Triva Society', samahan ng mahihilig sa trivia. Nakinig muna ako ng triviahan at debate. Maya-maya, sa gulat ko, paparating...si Ricky Lee mismo! Makikinig din ng nagti-trivia.

Sa sobrang pagka-excite ko, nakipagkuwentuhan ako sa kanya (kahit hindi niya naman ako kilala). 'Common man' si Ricky ng time na 'yun. Para lang talagang tambay na nagawi doon. Nagpakilala ako, sabi ko taga-komiks ako. Then napagkuwentuhan namin si Vincent Kua. Tapos kinuwento niya na ginagawa niya ang 'Trip to Quiapo 2' at tatlo pang libro. Tapos 'yung susunod niyang pelikula e horror. Tapos nagpameryenda siya ng Chippy at Pop, hehe. Tapos maya-maya umulan. Napakaripas na rin siya ng takbo. Hindi ko alam kung saan siya sumilong. Mahigit isang oras din bago timigil ang ulan.

Pag-uwi ko sa bahay, iniisip ko ulit ang ginagawa kong libro. Isa sa ilalagay ko sa acknowledgment page ay si Ricky Lee.