READING EXPERIENCE

Napaka-sensitibong parte ng katawan ng tao ang kanyang mata. Kapag kumakain tayo, hangga’t maari ay ayaw nating makakita ng nakakadiring eksena o larawan, dahil mawawalan tayo ng gana. Minsan naman, makakakita tayo ng kakilala sa kalye, biglang sasabihin natin, “Ang sakit naman sa mata niyang suot mo,” dahil hindi tayo komportable sa kulay ng damit niya o kaya ay wala iyon sa fashion sense natin.

Regular reader ako ng kung anu-ano. Sanay akong magbasa ng mahahabang libro at sangkatutak na teksto. Pero pagdating sa komiks, sensitibo ang mata ko. Hindi ko alam kung ganito rin ang nangyayari sa inyo.

Mas interesado akong basahin ang komiks na ‘maluwag’. Iyong nakakahinga ang mata natin sa mga ‘salita’ at ‘images’. Ang tingin ko ay hindi lang ito responsibilidad ng illustrator kundi maging ng writer din. Dapat ang tekstong ginagamit niya ay hindi nakikipaghabulan ng pa-detalye-han sa gawa ng artist.

Narito ang mga kumbinasyong nakikita ko sa komiks:

1. madetalye ang teksto, madetalye ang drawing
2. maluwag ang teksto, maluwag ang drawing
3. madetalye ang teksto, maluwag ang drawing
4. maluwag ang teksto, madetalye ang drawing

Sa mga klasipikasyong ito ko nakikita kung ano ang gusto ko bilang isang mambabasa. Sa apat na ito, ang number 1 na siguro ang pinakahuling komiks na babasahin ko.

Sa graphic novel na ito na pinamagatang ‘Stuck Rubber Baby’ na ginawa ni Howard Cruse, kung saan interesado ako sa tema ng kuwento, tungkol sa homosexual noong 1960s hippie years. Noong January ko pa ito nabili pero nakakailangan pages pa lang ang nababasa ko dahil putol-putol kong binabalikan, hanggang sa tinatamad na akong basahin. The fact na inindorso pa siya sa back cover ng comics analyst na si Scott McCloud at playwright na si Tony Kushner. Hanggang ngayon, hindi pa ako nangangalahati.

Samantalang itong ‘The Golem’s Mighty Swing’ ni James Sturm na kabibili ko lang two weeks ago ay binasa ko lang sa isang upuan. Samantalang wala akong kahilig-hilig sa baseball na siyang tema ng kuwentong ito.

Ibig sabihin nito, mayroong talagang komiks na masarap sa mata. Iyon bang nakaka-relax pang lalo kapag humahagod tayo ng tingin.

Noong wala pa ako sa komiks, at wala pa sa kukote ko kung ano ang komiks, mayroong mga kuwentong una kong binubuklat dahil masarap tingnan ang mga pages nila. At binabalikan ko na lang sa huli iyong mga hindi ko masyadong gusto. Narito ang ilan ng mga paborito ko noon:

Bukod sa maganda na gumawa ng pigura ng tao, lalo na ng mukha, ay maluwag pa ang layout ng drawing ni Hal Santiago. Isama pa dito ang maiksing paggamit niya ng caption at dialogue.

Si Jim Fernandez ang nakita kong manunulat sa komiks na mahaba gumawa ng caption at dialogues. Pero nagagawang paluwagin ni Ben Maniclang ang mga eksena para maging kaaya-aya sa mata.

Madetalye mag-drawing si Clem Rivera, pero maluwag ang layout. Bagay na bagay sa maiikling captions at dialogues ng script ni Vic Poblete. Maraming nobelang nagtambal ang dalawang ito at isa sila sa paborito kong team sa komiks.


Inosente pa ako noon kung ano ba ang structure o technicalities sa komiks. Nagbabasa ako bilang isang pangkaraniwang reader. At tingin ko ay na-hook ako sa ilang mga halimbawa sa itaas dahil hindi naman kaagad kuwento o drawing ang una kong nakita…kundi iyong presentation na ‘nakakahinga ang mata ko’.

*****

Nagbukas na rin ng blog ang manunulat sa komiks at pocketbook na si Imelda Estrella. Bisitahin din po natin ang seksi at hot mama na ito ng komiks.