REPRINTS

Pinadalhan ako ng isang kaibigan na nagtatrabaho sa Kuwait ng mga reprint ng American comics na translated na sa kanilang wika. Napakalaki talaga ng kinikita ng American comics publications bukod sa original prints ay marami pa silang franchise sa iba't ibang bansa. Sa palagay ko ay malakas sa Middle East ang mga komiks na ito dahil napakarami nilang titles hindi lang Marvel at DC, meron pa silang Archie. Iba't iba rin ang sukat, may kasinlaki ng Japanese comics, merong regular size, at merong kasinlaki ng magazine.

Dito sa Pilipinas, ang kasalukuyang gumagawa nito ay ang PSICOM. Marami na rin silang titles na inilalabas, pero karamihan ay 3-in-1. Sa isang komiks ay mayroong tatlong kuwentong mababasa. Glossy ang papel at maganda ang pagkaka-print. Sa halagang P95 ay makakabasa ka ng tatlong issues ng American comics.

Noong early 90s ay ginawa na rin ito ng Mahal Kong Pilipinas, Inc. (MKPI). Ang kaibahan lang nila sa PSICOM, newsprint ang ginamit nilang papel, black and white, at ang distribution ay sa bangketa. P5 ang initial price nila hanggang sa maging P7, at naging P10 nang maging colored na. Ang dami nilang titles na inilabas at halos lahat ay kinolekta ko. Nagkaroon pa sila ng announcement na magkakaroon ng sariling titles kaya nagpunta naman ako sa opisina nila sa White Plains. Pero hindi rin natuloy dahil bigla na lang silang nagsara, wala akong naging balita kung bakit.





*****
OFF TOPIC

Sobra ang init ngayon dito sa Manila. Dahil walang aircon ang bahay ko, hindi ako makapagtrabaho ng matino dahil naliligo talaga ako sa pawis. Ngayon ko lang naranasan na maligo ng tatlo hanggang apat na beses sa isang araw.

Kunsabagay, okey na rin na praktis ito. Dahil pagdating ko sa impyerno ay medyo sanay na ako hehehe.

E kasi ba naman, kahit ngayong mahal na araw ay nakasubsob pa rin ako sa trabaho. Hindi ko na yata alam ang hitsura ng simbahan.