Monday, June 29, 2009

COMICS ILLUSTRATING preview pages

Nagkita kami ni Ka Nestor Malgapo kahapon upang ibigay sa akin ang kopya ng kanyang napakagandang librong Dynacoil Books: Comics Illustrating. Ibinigay niya sa akin ito ng libre kaya laking tuwa ko. Salamat, Ka Nes!

Maraming interesting na pangyayari kung bakit nabuo niya ang librong ito noong 1980s. Wala naman pala ito sa plano, nagkataon lang na marami talagang gustong matutong mag-drawing sa komiks noon at ang pinakamadali nga, at para hindi gaanong maapektuhan ang kanyang deadlines noon, ay ang gumawa ng series of books para sa estudyante.

Ang aking interview sa kanya ay mababasa ninyo sa Pinoy Komiks Rebyu.

Maya-maya ay biglang dumating sa pinagtagpuan namin si Steve Gan, ilang sandali naman ay si Noli Zamora, at si E. R. Martin. Minsan ko lang nakakasama ang mga idolo kong ito kaya laking panghihinayang ko dahil kailangan kong umalis ng maaga para sa isa pang appointment.

****
Maari ninyong direktang orderin ang librong Comics Illustrating kay Nestor Malgapo sa email na o kaya ay mag-text sa 0906-3900222. Sa halagang Php1,000 ay sulit ito dahil binubuo ito ng sampung librong pinagsama-sama.





Saturday, June 27, 2009

EDSA


Paikut-ikot ako sa table ng mga indies noong nakaraang Summer Komikon nang matawag ang pansin ko sa isang komiks na may pamagat na ‘Baboy’. Nalaman ko na nanalo pala ito ng award sa Komikon bilang best independent komiks.

Matagal nang naglalaro sa isip ko noon na makipag-collaborate sa isang indie artist na hindi ko kilala. Saka miss na miss ko na ang magsulat ng kuwento. Hanggang istorya lang muna ang kaya kong gawin dahil ang number one ko talagang problema ay oras sa pagdu-drawing.

Kaya habang binubuklat-buklat ko ang indie na ‘Baboy’ ay panay naman ang sulyap ko ng palihim sa author nito na si Mel Kristopher Casipit. Medyo radikal kasi ang kuwentong naglalaro sa isip ko kaya gusto ko ring malaman muna kung makaka-relate ang artist na kakausapin ko. Pero mukhang kaya namang sakyan ni Mel ang trip ko, dahil isa rin sa itinitinda niyang indie ay may pamagat na ‘Dog Style’. Parang pareho kaming may kabaliwan sa ulo.

Bata pa ako nang maabutan ko ang martial law, ni hindi ko nga ito naramdaman. Iyung mga kuwentong mahigpit daw ang mga pulis, may curfew tuwing gabi, ay hindi ko talaga naranasan. Bata pa rin ako nang magkaroon ng People Power I noong 1986.

Noong nakatuntong lang ako ng college nang magsimula akong magtanong. Hanggang ngayon ganu’n pa rin ang tanong ko: Bakit malabo pa rin ang dapat managot sa kaso ng pagkakapatay kay Ninoy Aquino samantalang naging presidente na si Cory? May malalim bang ‘lihim’ ang pangyayaring ito?

Samantala, medyo malinaw naman sa akin kung bakit nagkaroon ng People Power II kung saan napatalsik si Estrada at pumalit si Arroyo. Pero naging malabo na naman nang magkaroon ng People Power III, at ang nakakagulat pa, meron pa ring People Power IV.

Naging palaisipan na tuloy sa akin mula noon, ano ba ang EDSA? Entablado lang ba ito ng mga pulitikong gustong maupo sa posisyon? O takbuhan lang ito ng mga taong naghahanap ng pag-asa?

Sabi sa isang kanta ni Jess Santiago: “Nag-People Power I, nag- People Power II…nag-People Power III, nag- People Power IV…kahit mag- People Power tayo maghapon, bayan natin ay hindi susulong…hangga’t hindi tayo natututo.”

Ang kuwentong ginawa ko ay walang kinalaman sa mga pinagsasabi ko, well, konti lang, at si Mel Casipit ang naisip kong mag-drawing nito. Tungkol ito sa EDSA 25, future na ito, kung saan prominenteng makikita na lang natin sa kalsada ay ang ‘Our Lady of Edsa’.

Natapos na ni Mel ang ilang pahina at target naming tapusin bago ang susunod na komiks event.

Friday, June 26, 2009

ALFREDO ALCALA sa ROCKWELL

Kasalukuyang naka-exhibit ang ilang trabaho ni Alfredo Alcala sa Powerplant Mall, Rockwell, Makati City. Matatagpuan ito sa Coucourse Level harap ng KFC at Rustan's grocery. Magtatapos ito sa linggo.

Thursday, June 25, 2009

ALAM KO NA!

Nag-post ako dito noong isang araw tungkol sa komiks ng Meralco. Ang ganda kasi ng pagkakagawa ng cartoons, kahawig ng gawa ni Elbert Or. Kanina ko lang nalaman na Kay Almar Denso pala ang artwork na 'yun. Si Almar ay ka-batch ko sa komiks noong early 90s at isa sa estudyante ni Vic Catan, Jr. Siya din ang kasabayan ko sa animation noong mid-90s sa pagti-training bilang in-betweener.

Ito pa ang ilan sa gawa ni Almar Denso.


Monday, June 22, 2009

PINOY KOMIKS REBYU preview pages

Matagal-tagal na rin na hindi ako nakahawak ng Adobe Pagemaker kaya para akong nagsisimula ulit kung paano mag-layout. Medyo primitibo na ako pagdating sa layouting dahil Adobe InDesign na ang ginagamit ngayon sa mga publications. Pero masarap pa rin at nakakaaliw ang mag-layout ng magazine pages. Hindi nga lang tuloy-tuloy dahil marami pa akong kulang na materyales.

At bilang patikim, at early promotion na rin, ay ito na ang ilang pages ng magasing Pinoy Komiks Rebyu. Mayroon itong 64 pages kaya siguradong malaman at maraming mababasa sa magasin na ito.



Wednesday, June 17, 2009

COMICS ILLUSTRATING by NESTOR MALGAPO


Isa si Nestor Malgapo ang nagkaroon ng pinakamaraming estudyante sa komiks noong aktibo pa siya sa pagdidibuho sa mga publications. Sa katunayan, maging mga taga-probinsya na hindi makarating sa Maynila ay nagkaroon ng pagkakataon na matuto sa pamamagitan ng kanyang mga librong inilabas noong 80s. Sampung libro ang inilabas niya na iba't iba ang topic tungkol sa pagdidibuho sa komiks. Nakakuha ako ng isang libro niya noon pero hindi ko na nakumpleto dahil ang hirap hanapin, at ang malas pa, hiniram ng isang kaibigan ang kai-isa kong libro at hindi na naisoli sa akin.

Kaya laking tuwa ko nang mag-email sa akin si Ka Nestor na muli niyang ilalabas ang mga librong ito, pero nasa isang compiled version na. Hindi pa ito available sa alinmang bookstore at tindahan pero maari na kayong magpa-reserve ng kopya kay Ka Nestor sa

Sulit ang librong ito dahil lahat ng paksa tungkol sa pagdidibuho sa komiks ay narito. At sa tingin ko nga ay ito ang kauna-unahang 'Filipino how-to-draw' books na magiging available sa market. Karamihan kasi ng mga librong mabibili natin sa bookstores ay gawa sa ibang bansa.

Para sa iba pang impormasyon tungkol kay Nestor Malgapo, puntahan ang mga sites na ito:

Gerry Alanguilan's The Philippine Komiks Art Museum
Komiklopedia
Lambiek
Arman Francisco's Komixpage

Tuesday, June 16, 2009

KOMIKS NG MERALCO


May ipinamimigay na komiks ang Meralco, kasabay ito ng inyong mga bill ngayong buwan na ito. Elbert, ikaw ba ang gumawa nito?

Thursday, June 11, 2009

PINOY KOMIKS REBYU

Marahil ay nasasabik na ang marami sa mga kaibigan na hiningian ko ng article at interviews sa email kung ano ba itong ilalabas ko. Ito na ang matagal ko nang niluluto sa utak ko pagkatapos ng isang taon na lumabas ang libro namin ni Fermin Salvador na 'Komiks sa Paningin ng mga Tagakomiks'. Marami pa kasi akong isinaalang-alang kung libro din ba ang kasunod, o komiks, o kung anupamang babasahin.

Hanggang sa napag-desisyunan ko na magasin ang ilabas. Isinangguni ko agad ito kay Fermin at aprubado naman sa kanya.

Siguro ay pamilyar na kayo sa 'The Philippine Comics Review' na lumabas noong 1980 galing sa Tikbalang Publications. At sa kasamaang-palad ay hindi na ito nasundan. Pinilit kong i-trace ang nasa likod ng naturang magasin at sinuwerteng nakakuha ako ng ilang impormasyon, kasabay din na lumutang ang ilang larawan (film negative, actually) na hindi nagamit sa magasin, pati na ang tingin ko ay gagamitin nila para sa second issue.

Ang nakikita ninyo sa itaas ay sample cover pa lang ng unang isyu ng magasin na ilalabas namin ni Fermin. Wala pa akong ideya kung ano ang ilalagay ko ditong image (drawing/picture) hangga't hindi pa tapos ang content ng magasin. Sa kasalukuyan ay halos nangangalahati na ako sa 64 pages na laman nito.

Regular akong maglalagay ng updates tungkol sa magasin sa mga susunod na araw.

Tuesday, June 09, 2009

ITO NA

Nagtaka ako kung ano itong sinisigarilyo ng kaibigan ko. 'Ito Na'. Sabi ko, ngayon ko lang nakita 'yan a. Saan meron niyan? Galing pa daw probinsya. Wala daw dito sa Maynila. Medyo natuwa lang ako kaya hiningi ko ang kaha.

Brutal ang pagkakalagay ng reminder. Government Warning: Smoking Kills. Sana ang inilagay na lang ay ITO NA : Ang Papatay sa Inyo!

Wednesday, June 03, 2009

Careless Whisper: The literal Version

Nagpunta ako sa isang bar noong isang gabi kasama ang mga kaibigan para manood ng banda. Biglang may nag-request ng kantang 'Careless Whisper', sigawan lahat ng tao. Mukhang ito daw ang number 1 song ngayon sa Pilipinas. Kinanta naman ng banda, lalo pang nagsigawan ang mga tao. Hehehe, kahit kailan ay hindi ko nagustuhan ang kantang ito, pero nang makita ko ang video na ito sa youtube e parang nagugustuhan ko na. Oopps, hindi po ito ang video ni Hayden-Katrina, ito ang literal version...

Tuesday, June 02, 2009

ONE RAINY DAY


Nakakatamad ang panahon, maghapon nang umuulan. Medyo tinatamad pa akong simulan ang komiks na ginagawa ko dahil karamihan ng eksena ay puro building. Maganda sana ang ganito dahil mahahasa ka ng husto sa perpective, ang problema ay kung marami kang naka-line-up na gagawin, kakain talaga ng oras lalo kapag full shot pa ang eksena.

Kaya habang naghihintay pa ako na bumalik ang sigla ay naghanap-hanap muna ako sa youtube ng mga paborito kong MTV na mahigit sampung taon ko na rin sigurong hindi napapakinggan. Ito ang dalawa sa pinakapaborito kong kanta ni Sting, wow! nang marinig ko ulit ay parang ayaw ko nang mag-drawing ng building haaay...sarap na lang makinig ng music maghapon. Kaya bilib ako sa mga artist ng Spider-Man, kailangan mo ng matinding pasensya at tiyaga para i-drawing ang mga building sa bawat eksena .



Monday, June 01, 2009

PALAISIPAN #1

Simula ngayon ay maglalagay ako dito ng mga palaisipan para sa lahat ng nagbabasa ng blog na ito. Kung maaari sana ay mailagay ninyo ang inyong tunay na pangalan sa comments section dahil may paggagamitan akong proyekto sa mga sagot ninyo. Kahit maganda ang inyong sagot kung hindi ninyo ilalagay ang inyong tunay na pangalan ay hindi ko tatanggapin. Ang proyektong binabanggit ko ay kasalukuyan ko pa lang binubuo at saka ko na lang muna sasabihin kung ano ito.

Narito ang unang palaisipan:


'Sa pangunguna ng Komiks Operation Brotherhood (KOMOPEB) ay nagkaroon ng parangal sa komiks noong 1984 na ipinalabas pa sa telebisyon. Ipinagkaloob ang grand award kay Don Ramon Roces sa pagsasabing siya ang nagsimula ng komiks publishing sa bansa.

Totoong siya ang naging publisher ng Liwayway magasin kung saan unang lumabas ang Kenkoy (1927) ni Tony Velasquez. Ngunit ang Liwayway ay hindi isang komiks kundi isang magasin ng mga balita, kuwento at artikulo. Ang kauna-unahang komiks sa tunay nitong esensya, at katulad ng mga komiks na lumalabas ngayon, ay ang Halakhak Komiks (1946) na inilimbag ni Atty. Jaime Lukas. Ang Kenkoy ay isa lamang filler ng magasin, at ito ay hindi rin naman una sa mga comics strips na lumabas, mas nauna ang mga political comic strips na lumabas sa mga magasing Telembang at Lipang Kalabaw (1920) na pinamumunuan naman ni Lope K. Santos.

Sino sa palagay ninyo ang dapat kumuha ng parangal sa pagiging kauna-unahang publisher ng komiks sa bansa?'